QazaqGaz және Shandong Energy ынтымақтастық туралы келісімге отырды

"QazaqGaz" ҰК" АҚ Басқарма Төрағасы Санжар Жаркешов пен Shandong Energy Group Басқарма басшысы Ли Вэй көмір химиясы саласындағы әріптестік туралы стратегиялық келісімге қол қойды. Қол қою Қытай Халық Республикасының Төрағасы Си Цзиньпиннің Қазақстан Республикасына сапары аясында ұйымдастырылған "Қытай – Орталық Азия" индустриялық-инвестициялық ынтымақтастық форумының аясында өтті. Құжатқа ҚР Премьер-Министрінің бірінші орынбасары Роман Склярдың қатысуымен құжаттармен алмасудың ресми рәсімі аясында қол қойылды.

Келісім Қазақстанда көмір химиясы өндірісін қалыптастыруды қарастыра отырып, көмір химиясы саласындағы өзара тиімді ынтымақтастықты дамытуды көздейді. Тараптар көміртегі қарқындылығын төмендету жөніндегі технологияларды енгізуге ерекше назар аударып отыр.

Сонымен қатар, қол қойылған құжат жылына 2 млрд м3 газ өндіретін жоғары технологиялық кешенді зауыт салуға негіз болады. Жоба кезең-кезеңімен қаржыландырылады деп күтілуде, нәтижесінде қаржыландырудың жалпы сомасы 2 млрд АҚШ долларын құрамақ.

Бірлескен жобаларды іске асыру экономиканы әртараптандырып,елдің энергетикалық қауіпсіздігін нығайтып қана қоймай, көмір ресурстарын пайдаланудың тиімділігін арттыруға, жаңа жұмыс орындарын ашуға және көмір химиясы саласының дамуына серпін береді деп күтілуде.

Shandong Energy Group Company Limited - Қытай мемлекеттік энергетикалық корпорациясы, елдегі екінші ірі көмір өндіруші, сонымен қатар теміржол, кеме қатынасы, көмір химиясы және электр қуатын өндіруші ірі өндірістік компания. Қытай мен әлемдегі ең ірі компаниялардың қатарына кіреді. Компанияда 210 мыңнан астам қызметкер мен 608 еншілес кәсіпорны жұмыс істейді, оның ішінде Қытайдың 22 провинциясында (автономды аудандарында) және шетелдегі 17 елде (аймақтарда) орналасқан 8 листингілік компаниясы бар. 2024 жылы компанияның операциялық кірісі 118 миллиард долларды құрап, Қытайдың 50 ірі көмір компаниясы арасында бірінші, Қытайдың 500 ірі кәсіпорны арасында 23-ші және әлемдегі 500 ірі компания арасында 75-ші орынға ие болды.